इन्धन सस्तो, सार्वजनिक यातायात भाडा २ प्रतिशत मात्रै घट्यो

इन्धनको मूल्यमा उल्लेख्य कटौती भएपछि सरकारले राष्ट्रिय रुटमा सञ्चालन हुने सार्वजनिक यात्रुवाहक तथा मालवाहक सवारीको भाडादर २ प्रतिशतले घटाएको छ। यातायात व्यवस्था विभागका अनुसार वैशाखमा पूर्ण रूपमा समायोजन हुनुपर्ने भाडा ५ प्रतिशत मात्र बढाइएको भएकाले अहिले पनि २ प्रतिशत मात्रै घटाइएको हो। नयाँ भाडादर असार १८ गतेदेखि लागू भएको छ। नेपाल आयल निगमले पेट्रोलमा प्रतिलिटर २० रुपैयाँ तथा डिजेल र मट्टितेलमा ३० रुपैयाँ मूल्य घटाएपछि भाडा समायोजन गरिएको हो।