गत भदौ १० गते भोटेकोशी नदीमा आएको बाढीले पक्की पुल बगाएपछि रसुवा र नुवाकोट जिल्ला जोड्ने फलाखुखोलामा निर्माण गरिएको नयाँ मोडुलर एक्रो ब्रिज (बेलीब्रिज) सञ्चालनमा आएको छ। नेपाली सेनाद्वारा असोज २० गतेदेखि निर्माण सुरु गरी २५ गते सम्पन्न गरिएको उक्त बेलीब्रिज आइतबार आयोजित एक कार्यक्रमका बिच सडक विभागलाई हस्तान्तरण गरिएको हो। बेलीब्रिज सञ्चालनमा आएपछि सवारी साधन आवतजावत सहज भएको छ।
