सरकारले अलपत्र ठेक्का तत्काल अन्त्य गर्ने

काठमाडौं, 2026-11-03  सरकारले देशभर वर्षौँदेखि अलपत्र र रुग्ण अवस्थामा रहेका विकास आयोजनाका ठेक्काहरू तत्काल अन्त्य गर्ने प्रक्रिया अगाडि बढाएको छ। पूर्वाधार विकास मन्त्री सुनिल लम्सालले सोमबार मन्त्रालय मातहतका कार्यालयहरूको प्रगतिबारे छलफल गर्दै रुग्ण ठेक्का तोड्ने र नयाँ खरिद प्रक्रिया सुरु गर्ने निर्णय भएको जानकारी सामाजिक संजालमार्फत दिएका छन् ।
मन्त्री लम्सालका अनुसार, सडक विभाग अन्तर्गतका रुग्ण ठेक्काहरू खरिद सम्झौता र प्रचलित कानुनबमोजिम व्यवसायीले काम नगरेको पाइएमा तुरुन्त खरिद सम्झौता अन्त्य गरिनेछ। तोडिएका ठेक्काहरूको हकमा बजेट सुनिश्चित गरी तत्काल पुनः बोलपत्र (टेन्डर) आह्वान गरिने तयारी पूरा गरिएको छ।