महानवमीका अवसरमा तलेजु भवानी मन्दिर सर्वसाधारणका लागि खुल्ला, भक्तजनको घुइँचो

महानवमीका अवसरमा आज हनुमानढोका दरबार क्षेत्रस्थित ऐतिहासिक तलेजु भवानी मन्दिर सर्वसाधारणका लागि खुला गरिएको छ। शक्तिस्वरूपा देवी दुर्गाको पूजा-आराधना गर्ने परम्पराअनुसार बिहानैदेखि भक्तजन दर्शन तथा पूजाअर्चनाका लागि मन्दिर पुगेका छन्। यस दिन राज्यका हातहतियार तथा औजारको पूजा (कोतपूजा) गर्ने चलनसमेत रहेको छ। विश्वसम्पदा सूचीमा सूचीकृत यो मन्दिरवर्षमा एक दिन मात्र खुल्ने भएकाले मन्दिर वरपर भक्तजनको बाक्लो चहलपहल र घुइँचो बढेको छ।