Author: chhotokhabar
नेपाल संयुक्त राष्ट्रसंघीय मानवअधिकार परिषद्को सदस्यमा निर्वाचित भएको छ ।न्युयोर्कस्थित राष्ट्र संघको मुख्यालयमा भएको निर्वाचनमा नेपालले १८० मतमध्ये १७३ मत प्राप्त गर्दै एसिया-प्रशान्त क्षेत्रबाट निर्वाचित देशमध्ये सबैभन्दा बढी मत पाएको हो। नेपाल सन् २०२७-२०२९ कार्यकालका लागि निर्वाचित भएको छ। नेपाल यसअघि सन् २०१८-२०२० र २०२१-२०२३ मा परिषद्को सदस्य बनेको थियो। नयाँ कार्यकाल सन् २०२७ जनवरी १ देखि सुरु हुनेछ।
जर्मनीको कोलोनमा १६ वर्षीया किशोरीमाथि रोबोटबाट यौन दुर्व्यवहार गरेको आरोपमा प्रहरीले दुई युवकमाथि अनुसन्धान थालेको छ। रातो र सुनौलो रङको १.२ मिटर अग्लो रोबोटले किशोरीलाई छोएको र अश्लील हाउभाउ गरेको आरोप छ। १६ र १९ वर्षीय युवकले घटनाको भिडियो खिचेर सामाजिक सञ्जालमा प्रत्यक्ष प्रसारण गरेको आशङ्का छ। प्रहरीले रोबोट र उनीहरूका दुई मोबाइल फोन जफत गरेको छ।
नेपाल राष्ट्र बैङ्कले आजका लागि विदेशी मुद्राको विनिमयदर निर्धारण गरेको छ । राष्ट्र बैङ्कका अनुसार अमेरिकी डलर एकको खरिददर १५२ रुपैयाँ १६ पैसा र बिक्रीदर १५३ रुपैयाँ ७६ पैसा निर्धारण गरिएको छ ।युरोपियन युरो एकको खरिददर १७० रुपैयाँ १३ पैसा र बिक्रीदर १७० रुपैयाँ ८० पैसा, युके पाउन्ड स्ट्रलिङ एकको खरिददर २०१ रुपैयाँ ४५ पैसा र बिक्रीदर २०२ रुपैयाँ २५ पैसा, स्विस फ्र्याङ्क एकको खरिददर १८२ रुपैयाँ ७३ पैसा र बिक्रीदर १८३ रुपैयाँ ४५ पैसा कायम गरिएको छ ।अष्ट्रेलियन डलर एकको खरिददर १०६ रुपैयाँ १० पैसा र बिक्रीदर १०६ रुपैयाँ ५२ पैसा, जापानी येन १ को खरिददर नौ रुपैयाँ ६३…
राजमार्गका होटलमा बासी, झिँगा भन्केको र कमसल खाना बेचिने तथा चर्को मूल्य लिइने गुनासो बढेपछि सरकारले कडाइ गर्ने भएको छ। पूर्वाधार विकास मन्त्रालयले यस्ता होटलको नजिकबाट निगरानी भइरहेको जनाएको छ। खानाले यात्रु बिरामी परेको पाइएमा होटल सञ्चालक र त्यहाँ गाडी रोक्ने चालकलाई कानुनबमोजिम कडा कारबाही गरिने जनाएको छ । मन्त्रालयले खान को गुणस्तर र मुल्यमा गुनासो भए प्रहरीको १०० नम्बरमा खबर गर्न पनि आग्रह गरेको छ ।
आज नवरात्रको चौथो दिन दसैँ घर वा पूजा कोठामा नौ दुर्गामध्येकी चौथो कुष्माण्डा देवीको विधिपूर्वक पूजा आराधना गरिँदै छ । प्रत्येक वर्ष आश्विन शुक्ल चतुर्थी अर्थात् दुर्गा पक्षको चौथो दिन कुष्माण्डा देवीको विधिपूर्वक पूजा आराधना गर्ने शास्त्रीय विधि छ । आध्यात्मिक, आधिभौतिक र आधिदैविक यी तीन तापलाई कुष्मा भनिन्छ ।नवदुर्गा मध्येकी चौथो देवी कुष्माण्डाले शरणमा आएका भक्तको तीनै ताप हरिदिने भएकाले यो नामाकरण भएको हो । कुष्माण्डाले सुराले भरिएका घडा तथा रगतयुक्त पात्र धारण गर्ने विभिन्न पुराणमा उल्लेख छ ।वरात्रमा देशभरका शक्तिपीठमा पूजा आराधना एवम् दर्शन गर्ने भक्तजनको भीड लाग्ने गर्छ ।
अन्तर्राष्ट्रिय मुद्रा कोष (आईएमएफ) ले चालु आर्थिक वर्ष नेपालको आर्थिक वृद्धि ३.७ प्रतिशत हुने प्रक्षेपण गरेको छ। मंगलबार सार्वजनिक ‘वर्ल्ड इकोनोमिक आउटलुक’ को अक्टोबर संस्करणले गत आर्थिक वर्षको वृद्धि ३.६ प्रतिशत रहने अनुमान गरेको छ। यसअघि आईएमएफले चालु वर्षको वृद्धि ४.६ प्रतिशत हुने प्रक्षेपण गरेको थियो। सरकारले भने ७ प्रतिशत आर्थिक वृद्धि गर्ने लक्ष्य राखेको छ। चालु वर्ष मुद्रास्फीति ५.८ प्रतिशत पुग्ने आईएमएफको अनुमान छ।
सुदूरपश्चिम प्रदेशसभाले नेपाली कांग्रेसको बहिष्कारबीच आर्थिक वर्ष २०८३/८४ को ३७ अर्ब ७० करोड रुपैयाँको बजेट बहुमतले पारित गरेको छ। यससँगै करिब तीन महिनादेखिको बजेट शून्यता अन्त्य भएको छ। बजेट विवाद समाधानका लागि सत्तारूढ नेपाली कम्युनिस्ट पार्टीले विवादित विषयमा छानबिन गर्ने र कात्तिक १५ गतेभित्र पूरक बजेट ल्याउने सहमति गरेको थियो।
नेपालले आईसीसी क्रिकेट विश्वकप लिग २ अन्तर्गत ओमानलाई ११३ रनले हराउँदै लगातार दोस्रो जित निकालेको छ। मंगलबार नेपालले दिएको २६४ रनको लक्ष्य पछ्याएको ओमान ४० ओभरमा १५० रनमा समेटियो। नेपालका नन्दन यादव र सन्दीप लामिछानेले समान तीन विकेट लिए। यसअघि रोहित पौडेलले ६१, अर्जुन कुमालले ४० र करण केसीले ४० रन बनाएका थिए। नेपालले शनिबार क्यानडासँग खेल्नेछ।
भोटेकोसी बाढीमा बेपत्ता भएका स्वदेशी तथा विदेशी नागरिकको मृत्यु प्रमाणपत्र जारी गर्ने प्रक्रिया अन्तिम चरणमा पुगेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ। मंगलबार संसदीय समितिको बैठकमा कार्यकारी प्रमुख डा. धर्मराज उप्रेतीले कानुनी व्यवस्था संशोधन भइसकेको र डीएनए परीक्षणपछि प्रमाणीकरण सहज हुने बताए। दसैंअघि करिब १०० अस्थायी आवास स्थापना गर्ने लक्ष्य पनि राखिएको छ।
राष्ट्रपति रामचन्द्र पौडेलले वन र भूमिसम्बन्धी दुई अध्यादेश जारी गरेका छन्। राष्ट्रपति कार्यालयका प्रवक्ता श्यामप्रसाद भण्डारीका अनुसार राष्ट्रपतिले मंगलबार दिउँसो ‘वनसम्बन्धी केही नेपाल ऐनलाई संशोधन गर्ने अध्यादेश, २०८३’ र ‘भूमिसम्बन्धी केही नेपाल ऐनलाई संशोधन गर्ने अध्यादेश, २०८३’ जारी गरेका हुन्।
नेपाली कांग्रेसको १५औँ महाधिवेशनअन्तर्गत सहमहामन्त्री खुलातर्फ रामहरि खतिवडा र अजयबाबु शिवाकोटी निर्वाचित भएका छन्। नेता खतिवडाका अनुसार उनले २ हजार ९१९ मत प्राप्त गर्दा शिवाकोटीले २ हजार ७२ मत पाए। तेस्रो स्थानमा रहेका डिल्लीराम सुवेदीले १ हजार ८५१ मत प्राप्त गरेका छन्। यद्यपि, केन्द्रीय निर्वाचन समितिले मतगणनाको अन्तिम नतिजा औपचारिक रूपमा सार्वजनिक गरिसकेको छैन।
सरकारले पूर्वाधार विकासमा लगानी बढाउन १ खर्ब रुपैयाँ अधिकृत पुँजी भएको ‘पूर्वाधार विकास कोष’ स्थापना गर्ने प्रस्ताव गरेको छ। पूर्वाधार विकास मन्त्रालयले यससम्बन्धी विधेयक, २०८३ को मस्यौदा तयार गरेको हो। मस्यौदाअनुसार कोषको जारी पुँजी ५० अर्ब र चुक्ता पुँजी २० अर्ब रुपैयाँ हुनेछ। कोषमा संघ, प्रदेश र स्थानीय सरकार, सरकारी संस्थान, बैंक तथा वित्तीय संस्था र अन्तर्राष्ट्रिय वित्तीय संस्थाको लगानी रहने प्रस्ताव गरिएको छ।
जर्मनीका लागि प्रस्तावित नेपाली राजदूत सरु जोशीले नेपाल–जर्मनी सम्बन्धलाई थप प्रगाढ बनाउँदै आर्थिक तथा श्रम कूटनीतिलाई प्राथमिकता दिने प्रतिबद्धता जनाएकी छन्। मंगलबार संसदीय सुनुवाइ समितिमा कार्ययोजना प्रस्तुत गर्दै उनले व्यापार घाटा न्यूनीकरण, पर्यटन प्रवर्द्धन, नेपाली श्रमिकको हकहित संरक्षण र व्यवस्थित श्रम आप्रवासनमा सक्रिय भूमिका खेल्ने बताइन्। सन् २०२८ मा नेपाल र जर्मनीबीच कूटनीतिक सम्बन्ध स्थापना भएको ७० वर्ष पुग्ने उल्लेख गर्दै जोशीले उक्त अवसरलाई दुई देशबीचको सम्बन्ध विस्तार र सहकार्यका लागि महत्वपूर्ण उपलब्धिका रूपमा विकास गर्ने बताइन्।
दसैंमा उपभोक्ताको सहजताका लागि काठमाडौं उपत्यकामा सुरु गरिएको सबै ब्रान्डका एलपी ग्यासको संयुक्त बिक्री वितरण बुधबारसम्म मात्रै सञ्चालन हुने भएको छ। नेपाल एलपी ग्यास उद्योग संघले बिहीबारदेखि पुरानै व्यवस्थाअनुसार डिलरमार्फत ग्यास बिक्री वितरण गरिने जनाएको छ। संघका अध्यक्ष दिवान चन्दका अनुसार बिहीबार र शुक्रबार नियमित आपूर्ति गर्नुपर्ने भएकाले संयुक्त बिक्रीको व्यवस्था बुधबारसम्म मात्रै लागू हुनेछ।
मंगलबार नेप्से परिसूचक ४.१२ अंक बढेर २,५९९ विन्दुमा पुगेको छ। कारोबार रकम अघिल्लो दिनको ४ अर्ब ४६ करोडबाट बढेर ४ अर्ब ७३ करोड रुपैयाँ पुगेको छ। जीवन बीमा समूह १.७७ प्रतिशत र बैंकिङ समूह ०.६९ प्रतिशत बढे। सगरमाथा जलविद्युत् कम्पनीको मूल्य सर्वाधिक १२.४४ प्रतिशत बढ्दा स्नो रिभर्सको मूल्य १५ प्रतिशत घटेको छ।
अमेरिकी राष्ट्रपति डोनाल्ड ट्रम्पले आगामी नोभेम्बरमा हुने एसिया भ्रमणका क्रममा उत्तर कोरियाली नेता किम जोङ उनसँग भेट हुनसक्ने बताएका छन्। सोमबार ह्वाइट हाउसमा पत्रकारको प्रश्नको जवाफ दिँदै उनले भेटको सम्भावना रहेको संकेत गरेका हुन्। ट्रम्पले चीनमा हुने एसिया प्रशान्त आर्थिक सहयोग (एपेक) नेताहरूको बैठकमा सहभागी हुने इच्छा पनि व्यक्त गरेका छन्।
आईसीसी विश्वकप लिग–२ त्रिकोणात्मक सिरिजमा नेपालले ओमानलाई २६४ रनको लक्ष्य दिएको छ। अल अमरेट क्रिकेट मैदानमा टस जितेर ब्याटिङ गरेको नेपालले ५० ओभरमा ८ विकेट गुमाउँदै २६३ रन बनायो। रोहित पौडेलले ६१, अर्जुन कुमालले ४० र करण केसीले ४० रन बनाए। रोहित र बसिर अहमदले चौथो विकेटका लागि ८६ रनको साझेदारी गरेका थिए।
सुदूरपश्चिम प्रदेशसभामा बजेट विवाद चर्किएपछि प्रमुख प्रतिपक्षी नेपाली कांग्रेसले सदनका सबै बैठक बहिष्कार गर्ने निर्णय गरेको छ। बजेट उपयुक्त नभएको र सरकारले प्रतिपक्षीसँग समन्वय नगरेको कांग्रेसको आरोप छ। यता सत्तारूढ नेकपाले बजेट पारित गर्ने, विवादित विषयमा संसदीय छानबिन समिति गठन गर्ने र कात्तिक १५ गतेभित्र पूरक बजेट ल्याउने सहमति गरेको छ।
राष्ट्रिय स्वतन्त्र पार्टी (रास्वपा) को अनुशासन आयोगले सांसद खगेन्द्र सुनारको अडियो प्रकरणमा छानबिन सुरु गरेको छ। आयोगले मंगलबारदेखि प्रमाण संकलन तथा तथ्य जाँच थालेको र सुनारसहित अडियोमा जोडिएकी महिलासँग पनि कुरा गर्ने जनाएको छ। महिलालाई अश्लील गाली र धम्की दिएको भनिएको अडियो सार्वजनिक भएपछि पार्टीले घटनालाई गम्भीर रूपमा लिएको छ।
नेपाल दूरसञ्चार प्राधिकरणले स्वीकृत मापदण्डविपरीत इन्टरनेट सेवा सञ्चालन गर्ने १४ सेवा प्रदायकलाई जनही ५० हजार रुपैयाँ जरिवाना गरेको छ। तोकिएकोभन्दा बढी शुल्क लिएको, स्वीकृत प्याकेजअनुसार सेवा नदिएको र अनुमति नलिई प्याकेज बिक्री गरेको आरोपमा कारबाही गरिएको हो। प्राधिकरणले अनधिकृत प्याकेज बन्द गर्न तथा ग्राहकलाई क्षति पुगेको भए क्षतिपूर्ति दिन पनि निर्देशन दिएको छ।