Author: chhotokhabar
धादिङको कृष्णभिर र तिङग्राङखानीमा पहिरो खसेपछि पृथ्वी राजमार्ग दुईतर्फी अवरुद्ध भएको छ। बेनीघाट रोराङ गाउँपालिकाका यी क्षेत्रमा अविरल वर्षाका कारण लेदोसहित पहिरो खस्ने क्रम जारी रहेको प्रहरीले जनाएको छ। कृष्णभिरमा सडक पूर्ण रूपमा बन्द हुँदा सवारी सञ्चालन हुन सकेको छैन। राजमार्गका अन्य स्थानमा पनि साना पहिरो खसेका छन् भने केही ठाउँमा सडक एकतर्फी सञ्चालनमा रहेको छ।
पूर्वप्रधानन्यायाधीश चोलेन्द्रशमशेर जबरा काठमाडौंको महाराजगञ्जस्थित निवासबाट पक्राउ परेका छन्। उपत्यका अपराध अनुसन्धान कार्यालयको टोलीले उनलाई पक्राउ गरेको पुष्टि भए पनि कसुर वा पक्राउको औपचारिक कारण सार्वजनिक भएको छैन। विभिन्न स्रोतका अनुसार पछिल्लो समय उनी राजनीतिक गतिविधि र विचाराधीन मुद्दामा चासो देखाउँदै सक्रिय थिए। यद्यपि, पक्राउको वास्तविक कारणबारे प्रहरीबाट विस्तृत विवरण आउन बाँकी छ।
एसियाली पूर्वाधार लगानी बैंक (एआईआईबी) को वार्षिक साधारणसभामा सहभागी हुन अर्थमन्त्री डा स्वर्णिम वाग्ले कतारको राजधानी दोहा प्रस्थान गरेका छन्। सभामा सदस्य राष्ट्रबीच दिगो पूर्वाधार विकास, आर्थिक साझेदारी र लगानी विस्तारका रणनीतिबारे छलफल हुनेछ। भ्रमणका क्रममा अर्थमन्त्रीले विभिन्न देशका समकक्षी तथा बैंकका उच्च अधिकारीसँग भेटवार्ता गर्ने कार्यक्रम छ। भेटमा नेपालमा विदेशी लगानी भित्र्याउने विषयमा छलफल गरिनेछ।
अविरल वर्षाका कारण पहिरो खस्दा मुग्लिन–नारायणगढ सडकखण्ड अवरुद्ध भएको छ। नाम्सी खोला पुलमाथि लेदोसहितको पहिरो खसेपछि आइतबार बिहान ७ः५५ बजेदेखि सडक अवरुद्ध बनेको सडक डिभिजन भरतपुरले जनाएको छ। पहिरो पन्छाउन उपकरण परिचालन गरिएको छ। सडक डिभिजनका अनुसार पहिरो हटाउन करिब दुई घण्टा लाग्ने अनुमान गरिएको छ। सडक अवरुद्ध हुँदा यातायात प्रभावित भएको छ।
नेपाली कांग्रेसको आन्तरिक निर्वाचनमा नयाँ पुस्ताको प्रतिनिधित्व सुनिश्चित गरिने भएको छ। निर्देशिका मस्यौदा टोलीका अनुसार अब वडादेखि केन्द्रीय तहसम्मका प्रत्येक कार्यसमितिमा १८ देखि २८ वर्ष उमेर समूहका कम्तीमा एक जना महिला र एक जना युवा अनिवार्य रूपमा निर्वाचित हुनुपर्ने व्यवस्था गरिँदैछ। नयाँ प्रावधानले पार्टीका विभिन्न तहका नेतृत्व संरचनामा युवा सहभागिता बढाउने लक्ष्य राखेको छ।
गत असोज ८ गतेदेखि परेको अविरल वर्षाका कारण देशका विभिन्न स्थानमा आएको बाढी र पहिरोमा परी हालसम्म छ जनाको मृत्यु भएको छ। विपद्का घटनामा बागमती र लुम्बिनी प्रदेशमा दुई–दुई जनाले ज्यान गुमाएका छन्। यस्तै, गण्डकी र कर्णाली प्रदेशमा पनि एक–एक जनाको मृत्यु भएको पुष्टि भएको छ। लगातारको वर्षासँगै विभिन्न क्षेत्रमा बाढीपहिरोको जोखिम बढेको छ।
शुक्रबारको परम्परालाई निरन्तरता दिँदै आजदेखि देशभरका सिनेमा हलमा तीन नयाँ नेपाली चलचित्र प्रदर्शनमा आएका छन्। ‘आचार्य’, ‘बा: एक योद्धा’ र ‘जदौ’ एकसाथ रिलिज भएका हुन्। फरक शैली र कथावस्तु बोकेका यी चलचित्रमा एक्सन, पारिवारिक तथा सामाजिक विषय समेटिएका छन्। तीनै फिल्मबीच दर्शक तान्न र बक्स अफिसमा राम्रो व्यापार गर्न प्रतिस्पर्धा हुने अपेक्षा गरिएको छ।
धादिङको बाङ्गेमा विशाल पहिरो खसेपछि पृथ्वी राजमार्ग पूर्ण रूपमा अवरुद्ध भएको छ। सडकको माथिल्लो भागबाट लेदोसहितको पहिरो खस्दा दुवैतर्फी यातायात ठप्प भएको छ भने सयौँ यात्रु बीचबाटोमै अलपत्र परेका छन्। त्रिशूली नदीको बाढीबाट विगतमा कटान भएको उक्त क्षेत्र संवेदनशील मानिन्छ। लामो समयदेखिको वर्षाले जमिन कमजोर बनेका कारण पहिरो खसेको स्थानीय प्रशासनले जनाएको छ।
अमेरिकी राष्ट्रपति डोनाल्ड ट्रम्पले चिनियाँ राष्ट्रपति सी जिनपिङको सम्मानमा ह्वाइट हाउसमा विशेष राजकीय रात्रिभोज आयोजना गरेका छन्। फरक राजनीतिक प्रणालीका बाबजुद दुई देशबीच सहकार्य र सम्बन्ध सुदृढ गर्ने विषयमा दुवै नेता सकारात्मक देखिएका छन्। रात्रिभोजमा एलन मस्क, जेफ बेजोस र सुन्दर पिचाईसहित प्रविधि क्षेत्रका दिग्गज सहभागी थिए। ट्रम्पले सीलाई चीलको कलात्मक मूर्ति उपहार दिएका छन्।
बंगालको खाडीमा विकसित न्यूनचापीय प्रणाली पूर्वबाट पश्चिमतिर सर्दै गएपछि नेपालका अधिकांश जिल्लामा वर्षा भइरहेको छ। मौसमविद्का अनुसार शनिबार पूर्वी क्षेत्रमा वर्षा केही घटे पनि पश्चिमी भूभागमा आज रातिदेखि पानी पर्ने क्रम बढ्नेछ। लगातारको वर्षासँगै नदी तथा खोलामा बहाव बढेको छ। मौसम विभागले विभिन्न जिल्लामा बाढीपहिरोको जोखिम बढेकाले सतर्क रहन आग्रह गरेको छ।
नेपाल आईसीसीको टी–२० अन्तर्राष्ट्रिय वरीयतामा दुई स्थान सुधार गर्दै १४औँ स्थानमा उक्लिएको छ। आईसीसीले शुक्रबार सार्वजनिक गरेको अद्यावधिक वरीयताअनुसार नेपाल १६औँ स्थानबाट दुई स्थान माथि उक्लिएको हो। पछिल्लो समय टी–२० क्रिकेटमा गरेको प्रदर्शनका आधारमा नेपालको वरीयता सुधार भएको हो। नयाँ वरीयताले अन्तर्राष्ट्रिय क्रिकेटमा नेपालको स्थान थप मजबुत भएको देखाएको छ।
लगातारको वर्षासँगै मुख्य राजमार्गमा पहिरो खसेर यातायात प्रभावित हुँदा काठमाडौंमा तरकारीको आपूर्ति ८५ प्रतिशतभन्दा बढी घटेको छ। कालीमाटी बजारमा बिहीबार ६ लाख ५७ हजार किलोभन्दा बढी कृषि उपज भित्रिएकोमा शुक्रबार ९७ हजार ६ सय ५१ किलो मात्र आएको छ। आपूर्ति घटेसँगै धनियाँको थोक मूल्य प्रतिकिलो ४५० रुपैयाँ पुगेको छ भने गोलभेँडा, काउली, खुर्सानीलगायत तरकारीको मूल्य पनि बढेको छ।
एसियाली खेलकुदअन्तर्गत क्रिकेटमा नेपालले अफगानिस्तानलाई ५ विकेटले पराजित गरेको छ। अफगानिस्तानले दिएको १०३ रनको लक्ष्य नेपालले १६ बल बाँकी छँदै पूरा गरेको हो। नेपालका लागि सन्दीप जोराले ३४ र रोहित पौडेलले ३३ रन बनाए। दीपेन्द्रसिंह ऐरीले १५ तथा गुल्सन झाले १ रन जोडे। बलिङतर्फ ललित राजवंशीले ४ र कुशल भुर्तेलले ३ विकेट लिए। नेपालले अब जापानसँग खेल्नेछ।
निरन्तरको भारी वर्षासँगै सडक माथिबाट लेदोसहितको पहिरो खसेपछि बीपी राजमार्ग पूर्ण रूपमा अवरुद्ध भएको छ। पहिरोले सडक ढाकेपछि राजमार्गमा सवारीसाधनको आवागमन ठप्प भएको छ। सडक खुलाउन पहिरो पन्छाउने प्रयास भइरहेको भए पनि तत्काल यातायात सञ्चालन हुन सकेको छैन। राजमार्ग अवरुद्ध भएपछि विभिन्न स्थानबाट आएका यात्रु तथा सवारीसाधन बीचबाटोमै रोकिएका छन्।
गुल्मीको कालीगण्डकी करिडोरअन्तर्गत रुद्रबेणी–पूर्तिघाट सडकखण्ड पूर्ण रूपमा अवरुद्ध भएको छ। राक्सेमा खसेको पहिरो र पाती खोलामा बढेको पानीको बहावका कारण यातायात सेवा ठप्प भएको हो। सडक बन्द भएपछि पाल्पा, बुटवल, पोखरा र बागलुङतर्फ जाने यात्रुहरू बीचबाटोमै रोकिएका छन्। हाल अवरुद्ध सडक खुलाउने प्रयास जारी रहेको जिल्ला प्रहरी कार्यालयले जनाएको छ।
मनसुनी र पश्चिमी वायुको प्रभावका कारण देशभर भारी वर्षा भइरहेको छ। यसले गर्दा नागढुंगामा सवारीसाधन रोकिएका छन् भने आन्तरिक हवाई उडानहरू समेत प्रभावित भएका छन्। बंगालको खाडीमा विकसित न्यून चापीय प्रणालीका कारण मौसममा आएको यो बदलावले जनजीवन कष्टकर बनाएको हो। जल तथा मौसम विज्ञान विभागले सतर्क रहन सबैमा आग्रह गरेको छ।
नेपाली कांग्रेसले १५औँ महाधिवेशनको लोगो र नारा सार्वजनिक गरेको छ। बिहीबार सामाजिक सञ्जालमार्फत सार्वजनिक गरिएको नारामा ‘परम्पराको सम्मान, परिवर्तनको संकल्प, समुन्नत नेपालका लागि सबल कांग्रेस अबको विकल्प’ उल्लेख छ। कांग्रेसले केन्द्रीय महाधिवेशन असोज १६ देखि १९ गतेसम्म काठमाडौंमा गर्ने तय गरेको छ। यसअघि असोज १० गते प्रदेशसभा र प्रतिनिधिसभा क्षेत्रीय अधिवेशन गर्ने कार्यतालिका छ।
ताप्लेजुङको दोभान बजारमा विद्युत् सर्ट भएर आगलागी हुँदा १० घरमा क्षति पुगेको छ। बिहीबार दिउँसो स्थानीय डण्डु शेर्पाको घरबाट सुरु भएको आगलागीमा ७ घर पूर्ण रूपमा जलेर ध्वस्त भएका छन् भने अन्य ३ घरमा पनि ठूलो क्षति पुगेको छ। नेपाली सेना, सशस्त्र प्रहरी, नेपाल प्रहरी र स्थानीयवासीले आगो नियन्त्रणमा लिने प्रयास गरेका थिए। आगो नियन्त्रणउन्मुख रहेको प्रशासनले जनाएको छ।
बिहीबार सेयर बजार परिसूचक नेप्से ११.७७ अंकले बढेर २६२९ अंकमा पुगेको छ। कारोबार रकम भने घटेर ५ अर्ब ४४ करोड रुपैयाँमा सीमित भएको छ। अघिल्लो दिन ६ अर्ब ३५ करोडको कारोबार भएको थियो। आज १७६ कम्पनीको मूल्य बढ्दा ९५ कम्पनीको घटेको छ। उत्पादन तथा प्रशोधन समूह सर्वाधिक १.८३ प्रतिशत बढ्दा निर्जीवन बीमा समूह ०.३३ प्रतिशत घटेको छ।
पूर्वराष्ट्रपति विद्या भण्डारीलाई नेकपा (एमाले)को वरिष्ठ नेता बनाउने प्रस्ताव अध्यक्ष केपी शर्मा ओलीले अघि बढाउने भएका छन्। ओलीले सचिवालय बैठकमा भण्डारीलाई वरिष्ठ नेता बनाउन केन्द्रीय कमिटीमा प्रस्ताव गर्ने जानकारी गराएको एक नेताले बताएका छन्। यसअघि भण्डारीको पार्टी सदस्यता नवीकरणसम्बन्धी विवाद भएको थियो। केही समयअघि ओली र भण्डारीबीच भएको भेटवार्तापछि वरिष्ठ नेता बनाउने प्रस्ताव अघि बढ्न लागेको हो।